E Gran Konflikto

Si a puntra bo: “Kua tema sentral ta kore a lo largu di henter Beibel?” kon lo bo a kontestá? Hesus? E plan di salbashon? E krus? Sí na tur tres, naturalmente! Pero e tres tópikonan importante akí ta desplegá kontra un tema ainda mas kompletu: “e gran konflikto.” E tema akí ta penetrá den e Beibel, for di e buki di Génesis te na e buki di Revelashon.

E gran konflikto a kuminsá den shelu ku e rebelion di Lucifer kontra Dios. E núkleo di e konflikto kósmiko akí ta e kuestion di e amor di Dios. E ta kompletamente amoroso? E tin e mihó interesnan di Su kriaturanan na bista? Of E ta un diktador outoritario ku ta deseá solamente loke ta den Su interes propio?

E lèsnan di e kuartal akí ta sigui historia mundial for di punto di bista di Dios, manera profesia ta revel’é, for di tempu di Kristu bin abou a lo largu di siglonan te na nos tempu i mas ayá. E naturalesa mes di Dios ta amor, i pa e motibu ei, tur Su aktonan ta amoroso, aunke e echo akí kisas no semper ta evidente pa sernan humano finito òf asta angelnan. Pero e amor di Dios ta revelá progresivamente segun ku e gran konflikto ta desplegá. Nos ta mira su haltura i profundidat mas klaramente a traves di e krus. Na Kalvario, e amor di Dios tabata desplegá dilanti di henter universo, ora Kristu a drama Su bida pa redimí humanidat, i e derota final di Satanas tabata sigurá.

Sinembargo, e bataya ta kontinuá. Satanas a purba destruí Hesus riba e krus i, a lo largu di siglonan, nos ta mir’é purbando di destruí e pueblo di Dios. Aunke Satanas a persiguí e iglesia di Dios kruelmente i a masakrá miónes, Dios tabata semper presente ku Su pueblo i nunka lo bandoná nan.

E kuartal akí lo sigui e desaroyonan prinsipal den e gran konflikto, kuminsando ku e rebelion den shelu. Nos lo eksplorá e temanan sentral di e konflikto entre Kristu i Satanas. Nos lo mira e kurashi indomabel di e waldensenan apesar di persekushon feros, i e determinashon di e Reformadónan pa sigui bèrdat di Beibel asta apesar di tortura, kadena, staka di kandela, i martirio.

Komentando riba e fe di e gigantenan spiritual akí, Ellen G. White ta deklará: “E Beibel tabata nan outoridat, i pa medio di su siñansa nan tabata tèst tur doktrina i tur afirmashon. Fe den Dios i Su palabra tabata sostené e hòmbernan santu akí miéntras nan tabata entregá nan bida na e staka di kandela.”—The Great Controversy, p. 249.

E Reforma a sende un antorcha di bèrdat ku ainda ta kima intensamente. E fe fundamental den Skritura, di e reformadónan i nan siguransa firme di salbashon pa grasia pa medio di fe a traha kaminda pa e lantamentu di e movementu atventista, defendé pa William Miller i kantidat di otronan rònt mundu.

Dios a lanta Iglesia Atventista di Shete dia pa konstruí riba e fundeshi poné pa e Reformadónan pa asina restourá bèrdatnan bíbliko ku a pèrdè for di bista a lo largu di siglonan. Sentral na su mishon tin proklamá e mensahe di e tres angelnan di Revelashon 14:6–12, e último atvertensia di Dios na un mundu ku pronto ta yega na un fin.

E proklamashon akí ta lanta e rabia di Satanas, deskribí komo un dragon pa apòstel Juan: “I e dragon tabata furioso riba e muhé, i a bai pa hasi guera ku e restu di su desendientenan, kendenan ta warda e mandamentunan di Dios i tin e testimonio di Jesu Cristo” (Rev. 12:17). Tambe nos lo studia e eventonan final den e gran konflikto, inkluyendo e triunfo di e amor di Dios riba tur e prinsipadonan i podernan di fièrnu, ku ta duna inisio na e kreashon di shelunan nobo i un tera nobo.

Aunke e base di e lèsnan di e kuartal akí ta e Beibel, nos lo uza e buki The Great Controversy, pa Ellen G. White, komo nos skema temátiko ora nos ta studia e tópiko tremendo akí. E kapítulonan riba kua kada lès ta basá ta notá pa fasilitá su uzo komo un buki komplementario pa mas estudio i kompartí pa nos tur lo por “konosé e amor di Kristu ku ta surpasá konosementu” (Efe. 3:19) mas plenamente.